آچيقلاما
دونيانين دورد طرفينده ياشايان ميللی حاقلاری اوغروندا، ميللی مدنيتی يولوندا، ميللی آزادليغی اوچون چاليشان بير قوروپ آزربايجانلی‌نين، اوچ ايل گرگين امگی نتيجه سينده، ۲۱/۰۳/۲۰۰۳ آزربايجان ميللی جبهه‌سی (AMC) ايسوچده ياراندی.
آزربايجان ميللی جبهه‌سی‌نين مرامی و آمالی
آزربايجان ميللی جبهه‌سی‌نين مقصدی تانيديغيميز باشقا کلاسيک جبهه‌لر کيمی بير نئچه پارتييا، تشکيلات و اورقانين بير جبهه چاتيسی آلتيندا بيرلشيب فعاليت گؤسترمه‌يی دئييل. بيزيم فيکيريميزجه بو جبهه‌نين مرامی تام فرقيلی‌دير. بيز بو جبهه‌نی يارادماقلا فرقيلی فيکير صاحيب‌لری اولان پارتييا، تشکيلات، جمعيت‌لر بير مشترک آمال- آزربايجان مسئله‌سی اطرافيندا بير آرايا گئتيرمک، بير هدفه وورماق اوچون فعاليتلريميزی داها دا متشکيل شکيلده بير يئردن يؤنلتمک‌دير. يعنی بونو «فيکير جبهه‌سی» ده آدلانديرماق اولار.
آزربايجان ميللی جبهه‌سی (AMC) چاليشير کی، گونئی آزربايجانداکی ميللتيميزين بشر حقوق‌لاری اساسيندا اؤز طالعينی، مقدراتينی تعيين ائتمک‌کيمی مقدس بير يولدا بوتون آزربايجان قووه‌لرينی آرالارينداکی فيکير آيريليغينا باخماياراق اونلاری بير آرايا توپلاييب، بيرليکده موباريزه‌يه اَن سون آماجی فتح ائده‌نه‌قدر رهبرليک ائتسين!