آزربایجان ميللی جبهه‌سی‌نين پلاتفرمی
آزربایجان ميللی جبهه‌سی گونئی آزربایجاندا مختلف اينتئلکتوآل جريانلاردان عبارت بير پلوراليست تشکيلات اولاراق اؤز سياسی پروگرامی و گؤروشونو آشاغيداکی قئيد اولان ۱۴ ماده‌ده بيان ائدير:
۱- حاکيميت ميللتين دير. هئچ بير گوج هئچ بير زامان بو اساس پرنسيپی و ياراديلميش دئموکراتيک حکومتين صلاحيتينی محدودلاشديرا بيلمز.
۲- خالقلارين اؤز مقدراتينی تعيين ائتمه حاققينی اساس توتاراق بين‌الخالق حقوق نورمالاری چرچيوه سينده اينديکی ايران دؤولتی‌نين ترکيبينده اولان گونئی آزربایجانين تاريخی تورپاقلاريندا آزربایجان ميللی حکومتينی ياراتماق.
۳- وطنداشلاريميزين حقوقلارينين مدافعه‌سی اوچون BMT طرفيندن قبول ائديلميش عموم دونيا اينسان حقوقلاری بيان‌نامه‌سی ÜİHB قبول ائتمک و تطبيق ائتمک.
۴- قادينلار، اوشاقلار، عليل‌لر، ديل حقوقلاری‌ايله باغلی بين‌الخالق عالمينده تانينميش بوتون بيان‌نامه و کنوانسيالاری قبول ائتمک، بو حاقلاری مدافعه ائتمک. اشکنجه و اؤلوم جزالارينين قاداغان اولونماسينی، سياسی، دينی، جينسی، عقيده و عيرق آيری سئچکيليلرين آرادان قالديريلماسينی تامين ائتمک.
۵- دين و فيکير آزادليغينين ان اؤنملی تاميناتی کيمی دؤولت قوروجولوغوندا دين و دؤولتين آيريلماسی، دؤولت اداره ائديليجيينده و قانون وئرديجيليينده لاييکليين، دونيویليين تمل پرنسيپ کيمی قبول اولونماسی.
۶- دئموکراتييانين اساس ستون‌لاريندان اولان سؤز آزادليغينين تاميناتی اوچون هئچ بير حاکيمييته باغلی اولمايان مستقيل مئديالار: تلويزيا، مطبوعات و سوسيال شبکه‌لر ياراديلمالی دير.
۷- بو گون اينسانليغين اوزلشدييی بؤيوک گلوبال پروبلم‌لردن اولان اکولوژييانين چيرکلنمه‌سی و اطراف محيطين قورونماسی بؤلگه‌ميز اوچون‌ده آکتوئال بير مسئله‌دير. آزربایجان حکومتی خالقيميزين ساغلام محيط‌ده ياشاييب وار اولماسينی و گله‌جک نسيللر اوچون اطراف محيطين قورونماسينی دايما ديققت مرکزينده ساخلامالی، اکولوژييايلا باغلی بين‌الخالق لايحه‌لرينده آکتيو ايشتراک ائتمه‌لی، بو ساحه‌ده دؤولت پروگرامی حاضيرلامالی، اؤلکه‌نين صنايعه‌سينی، ايقتصاديياتینين اينکشافيندا اکولوژييايا وورولان ضررين مينيموما ائنديريلمه‌سينی و «اينسان فاکتورونون» هر زامان اؤن پلانا چيخارتماسی‌دير.
۸- مين ايللردن بری بؤلگه‌ده چوخونلوق ساييلان آزربایجان تورکلری آزربایجان تاريخی تورپاقلاريندا بؤيوک و شرفلی ائمپرييالار و سولاله‌لرين قوروجوسو اولموشلار. تورک سولاله‌لری تاريخ بويو تولئرانتليق نمايش ائتديره‌ره‌ک، مختليف ائتنيک و دينی آزليقلارلا دينج شکيلده بيرگه ياناشی ياشاماق اوچون تقديره لاييق بير مدل ياراتماغا نايل اولموشلار. مستقيل آزربایجان دؤولتی بو تاريخی تجربه‌دن يارارلاناراق، جنوبی آزربایجاندا بوتون ائتنيک گروپلارين و دين‌لرين صلح و عدالتلی اينکشافينی تامين و بو يگانه مدل بير ميراث کيمی قورونمالی‌دير.
۹- گونئی آزربایجاندا رسمی ديل کيمی «آزربایجان تورکجه‌سی» تانيناجاق. ديگر ميللی آزینليقلارين ديل‌لری، مدنييتی، اينانجيلاری بوتون توپلوموموزون قازانديغی مدنی زنگينليک‌دير. ميللی آزليقلارين اؤز آنا ديلينده تحصيل آلماسی، اؤز مدنيتينی اينکشاف ائتديرمه‌سی و کولتور ايرثينين قورونماسی گونئی آزربایجاندا ميللی حکومت طرفيندن تامين اولونمالی‌دير.
۱۰- وطنيميزين ايقتصادی، سياسی، سوسيال، مدنی اينکيشافينی «اينسان کاپيتالی» اوزرينده قورماغا، ياتيريملاری داها چوخ ميللتيميزين تحصيلينه، علمه يؤنلده‌ره‌ک اؤلکه‌ميزی «خام مال» و «کند تصرفاتی» اؤلکه‌سی سويه‌سيندن يوکسک اينکشاف ائتميش صنايع اؤلکه‌سينه چئويرمک.
۱۱- آزربایجانين ايقتصادی اينکشافی اؤنملی مسئله کيمی ديرلنديريلمه‌ليدير. بونونلا هم اؤلکه‌ميزين اينکشافينا، دونيادا نفوسونون آرتماسينا، همده جمعيتيميزده‌کی يوخسوللوق، سفالت، ايشسيزليک کيمی ايقتصادی- سوسيال پروبلم‌لرين چؤزولمه‌سينه خدمت ائتميش اولاجاييق.
۱۲- آزربایجان حاکيميتی‌نين هم داخيلی هم خاريجی سياستی ميللی ماراقلاريميز اوزرينده قورولمالي‌دير. دئموکراتيک، لاييک بير دؤولت اولاراق بين‌الخالق ايقتصادی اينتقراسييا پروسس‌لرينده آکتيو ايشتراک ائتميه، خاريجی سياستيميزده دوستلوق، امکداشليق، طرفداشليغا، قونشو اولدوغوموز دؤولت‌لرله دينج، امين- آمانليق شرايطينده ياشاماغا نايل اولمالييق.
۱۳- تورک ميللتی ايران جغرافيياسينا سپلنميشش‌دير. بو باخيمدان گونئی آزربایجاندا ميللی حکومتين يارانماسی، ايراندا بوتون مظلوم ميللتلره خصوصيله، ايران تورک‌لرينه يارديم اولاجاقدير. اونلارين فوندامئنتال حقوق‌لارينی مدافعه ائتمک، يئری گلديينده مادی- معنوی دستک گؤسترمک آزربایجان ميللی حکومتی‌نين ديققت مرکزينده دوراجاقدير.
۱۴- ميللی رمز و سيموللاريميز گله‌جک دؤولتچيلييميزده ميللت نماينده‌لری طرفيندن تعيين اولوناجاقدير.